Gran acollida do Muralla de Letras, que completou a capacidade do Vello Cárcere durante a fin de semana

Muralla de Letras rematou este domingo despois de tres xornadas de actividades arredor dos libros e da lectura que contaron cunha grande acollida por parte do público. Os concertos, contacontos, encontros lectores e presentacións organizadas durante a fin de semana completaron a capacidade do espazo central e do auditorio do Vello Cárcere, adaptada á situación sanitaria.

A vicepresidenta da Deputación, Maite Ferreiro, agradeceu a resposta por parte do público e a colaboración de autoras, editoriais e artistas para cadrar axendas e participar nesta programación, pensada para dinamizar o sector editorial e o mercado libreiro.

Muralla de Letras incluíu presentacións editoriais e encontros lectores con Suso de Toro, Ledicia Costas, Marica Campo, María Lado e Lucía Aldao, Pilar García Negro ou Luis López Alonso . Tamén se celebraron concertos e contacontos para público infantil a cargo de Magín Blanco, Paco Nogueiras, Paco Cerdeira “Pakolas”,  Anxo Moure, Raquel Queizás, Brais das Hortas e o colectivo Polo Correo do Vento. Mercado de Nadal.