Taboada arranca as patronais coa Festa da Mocidade, que conta co apoio da Vicepresidencia da Deputación
Taboada celebra o venres a Festa da Mocidade, que abre o programa das festas patronais cunha ampla axenda de actuacións e actividades do 11 ao 15 de agosto e que conta coa colaboración da Vicepresidencia da Deputación de Lugo.
A deputada de Cultura Iria Castro, o concelleiro de Cultura, Deporte e Medio Rural, Manuel Diéguez, e a concelleira de Igualdade, Benestar e Sanidade, Patricia Conde, presentaron este mediodía o cartel da xornada, con concertos do grupo chantadino de rap Tiam GZ, dos composteláns Tecor Societario e de DJ Misa (Claudia Quintela) no Campo da Feira, que abrirá as 21.30 con postos de bebida e comida. Durante a tarde, haberá unha ruta polos bares da vila.
Iria Castro valorou que “as festas patronais acollan programacións coma esta, na que se amosa a música que se está facendo en galego, en diferentes estilos” e desexou boas festas á veciñanza de Taboada.
O concelleiro de Cultura, Deporte e Medio Rural Manuel Diéguez explicou que “este ano, asumimos o reto de organizar as festas patronais por primeira vez de forma directa. En pouco tempo posto que o actual goberno botou a andar hai menos de dous meses, polo que queremos agradecer a colaboración da veciñanza e dos negocios de Taboada, así como o traballo do persoal do concello e a colaboración das institucións para sacalas adiante” “Fixemos un programa pensando en toda a veciñanza. Con propostas e música para todos os públicos e gustos, desde os grupos que actuarán na Festa da Mocidade ata as orquestras da verbena. Son unhas datas para celebrar o que nos une como concello, coas persoas que queremos, veciños, visitantes e amigos”, engadiu.
O mesmo venres, durante a tarde, haberá actividades para público infantil na Alameda: un espectáculo de Novo Circo e clown con Letriska Inmobile e atraccións gratis para rapazas e rapaces menores de 16 anos.
Sábado 12 de agosto
Actuación da Banda EGS de Lugo (13.30 horas) e verbena coa orquestra Ritmo Joven.
Domingo 13 de agosto
Actuación de Xograres de Lemos (13.30 horas) e verbena coa orquestra Tatto
Luns 14 de agosto
Festa do Óso na Medela, coa actuación da charanga De Bande e festa da escuma e xogos na auga
Milagriños Fest, con actuacións de Color Carne, Mügre, Nacarúh e Sebusca na Alameda
Martes, 15 de agosto
Festival Internacional con actuacións de Pom´Kanel (Martinica) e Rechouchíos (a partir das 20.00 horas).