Abre o Mercado de Nadal, con pezas de cerámica, marroquinería, complementos e xoguetes feitos á man por artesás e artesáns da provincia
t
O mercado estará aberto ata o 5 de xaneiro
Esta tarde inaugurouse na Praza de San Marcos o Mercado de Nadal, organizado polo Centro de Artesanía e Deseño da Vicepresidencia da Deputación de Lugo. Ata o vindeiro 5 de xaneiro, once obradoiros artesáns da provincia mostrarán e venderán na feira os seus produtos, desde pezas de cerámica ata marroquinería, xoguetes ou complementos de moda.
Na apertura da feira, o deputado de Artesanía e Deseño Efrén Castro explicou que “o Mercado pretende ofrecer ás artesás e artesáns da provincia un espazo para vender os seus produtos nun dos periodos de maior demanda, coincidindo co Nadal e coa época de agasallos, e nun ano especialmente complicado para o sector, moi castigado pola crise sanitaria”. O deputado nacionalista sinalou que a feira invita “a un consumo responsable, de produtos feitos á man, por profesionais da provincia, con materias primas e procesos de elaboración respectuosos co medio natural”.
Artesáns participantes
A cerámica ten unha ampla representación na feira coas firmas La Bellota Mágica, Lanalutum, Mi madre no me deja e Regal Cerámica, que ofrecen pezas para o servizo de mesa, como xogos de café, cuncas ou vaixelas, e tamén elementos decorativos, como xarróns, candelabros, centros de mesa ou murais, e pezas de bisutería.
A oferta tamén é diversa en marroquinería, coas firmas Bolboretas de Coiro, Senda, Tres Caracoles ou Vidal Revilla, que traen a feira unha grande variedade de mochilas, bolsos, moedeiros, carteiras, tarxeteiros, cinturóns, accesorios para móbiles ou fundas para instrumentos musicais.
Os xoguetes, produto estrela entre os agasallos de Nadal, tamén terán o seu oco na feira cos enxeños en madeira de Enxógate e os bonecos en fieltro ou fío de algodón confeccionados coa técnica xaponesa de amigurumi de Lucecús.
A firma Mis Marinillas, que se dedica a creación de complementos de moda artesáns, completa a oferta de produtos á venda no mercado. Ademais dos obradoiros, a feira conta este ano cun espazo de mostra que reúne unha selección de pezas das artesás e artesáns participantes.
Concerto do coro Cantar Delas
A presentación do Mercado de Nadal contou coa actuación do coro feminino Cantar Delas, que interpretou na Praza de San Marcos un repertorio artellao arredor de personaxes femininas que pasaron á historia pola loita contra as inxustizas e o cuestionamento da orde social.
Horarios
O Mercado de Nadal permanecerá aberto ata o 5 de xaneiro, en horario de 11.00 a 14.00 horas e de 17.00 a 21.00 horas, agás os días 25 de decembro e 1 de xaneiro. O 24 e o 31, o peche adiantarase ás 19.00 horas.