Pórtico da Gloria | Diputación de Lugo

PÓRTICO DA GLORIA

A iconografía musical, cicelada ao longo do vello camiño a Santiago, representa a mellor fonte documental para o estudo da música medieval. Estas imaxes son excepcionais para recuperar os sóns que, nalgúns casos, perviven na nosa música popular. A cidade de Santiago de Compostela, meta da peregrinaxe, destaca con dous centros excepcionais: o Pórtico da Gloria da catedral Compostelá e o Pazo de Xelmírez.

Este conxunto monumental dos séculos XII e XIII foi obxecto dun proxecto multidisciplinar de investigación e reconstrución impulsado pola Deputación de Lugo entre os anos 1993 e 1994.

Un equipo coordinado entre artesáns, organólogos, historiadores da arte e músicos reunidos no Obradoiro de instrumentos musicais, estudou os instrumentos esculpidos en pedra, nas ménsulas e na arquivolta e representados en diferentes posicións, o que permitiu obter detalles de tódolos ángulos e poder así acometer con certas garantías a reconstrución en madeira. O resultado foi unha colección única de réplicas de instrumentos de corda desta época, tanto desde o punto de vista acústico como ergonómico. Coa finalidade de presentarlles a estudosos e público en xeral o traballo desenvolto e potenciar o uso dos instrumentos reconstruídos, constituiuse un grupo de especialistas en música medieval baixo o nome de Porque trobar... co que percorreron diferentes países Europeos; o seu disco Compostela Medieval foi seleccionado como “Choc Monde de la Musique” no ano 1999.

GALERÍA DE IMAXES