O deputado de Rural Daniel García solicitou unha reunión co conselleiro de Cultura para concretar un plan de actuación nas pallozas de Piornedo
O deputado de Rural da Vicepresidencia da Deputación de Lugo Daniel García Fernández emprazou ao conselleiro de Cultura, Lingua e Xuventude José López Campos a unha reunión para concretar un plan urxente para a reparación das pallozas de Piornedo e un marco de financiamento estable para a súa conservación e mantemento.
A área provincial remitiu á Consellería un escrito en que solicita “unha xuntanza con representantes das tres administracións e coa propiedade das pallozas para avanzar nunha solución tan necesaria como urxente” para este conxunto patrimonial único en Europa e tende a man “para establecer pontes interadministrativas” que aseguren a viabilidade do BIC nos vindeiros anos.
Daniel García Fernández sinalou “que urxe materializar a vontade de colaboración que o conselleiro expresou o pasado mércores no Parlamento en resposta a unha pregunta formulada polo BNG, para que este tema non quede aparcado nos despachos da Xunta de Galicia como noutras ocasións. Nós seguiremos, como vimos facendo, apoiando ano a ano a conservación destes bens de interese cultural pero non podemos ser a única administración que o faga"
O responsable provincial, que acompañou a veciñanza de Piornedo ata Compostela para seguir a sesión parlamentaria, lembrou que “a propiedade privada das pallozas non é obstáculo para que a administración habilite axudas directas, como as que a propia Xunta de Galicia convocou ata o ano 2010, ou como as que reciben outros particulares e entidades privadas titulares de bens patrimoniais como a Igrexa”.
O escrito, remitido este martes, recolle as dificultades que afrontan as persoas propietarias das pallozas para realizar as labores de conservación pola falta de centeo, de man de obra profesionalizada para reteitar e polas características das infraestruturas nunha ubicación de alta montaña.
Así mesmo, explica a colaboración que a área de Rural da Vicepresidencia da Deputación de Lugo mantivo coa asociación Teitos de Piornedo nos últimos anos, a través de subvencións nominativas para financiar actividades de conservación e mantemento das pallozas e facilitar o cultivo do centeo.