“A memoria do son”, con fondos do Centrad, iniciará a súa itinerancia o 29 de xuño no Museo da Catedral de Santiago de Compostela
O deputado de Artesanía e Deseño, Efrén Castro, e o director da Colección de Instrumentos do Centro de Artesanía e Deseño, Luciano Pérez, presentaron esta mañá os materiais divulgativos e interactivos que acompañarán a exposición “A memoria do son”, que reúne parte dos fondos instrumentais e do arquivo documental do centro provincial nun formato adaptado á itinerancia e á experimentación por parte do público.
A mostra, concebida para a difusión deste patrimonio máis aló do Centrad, comezará a súa andaina no Museo da Catedral de Santiago de Compostela, onde se inaugurará o 29 de xuño. Efrén Castro sinalou que “a inauguración da itinerancia en Compostela supón un gran impulso para a proxección e recoñecemento da colección e do traballo realizado no Centrad internacionalmente” e “trae as pezas ata súa orixe xa que parte dos fondos instrumentais e do traballo documental parten de investigacións desenvolvidas sobre a iconografía do pórtico da Gloria e sobre as esculturas do rei David que se conservan na propia catedral”.
O Museo da Catedral de Santiago de Compostela, que volve abrir ao público con esta mostra despois de meses pechado pola pandemia, será o primeiro destino dunha itinerancia que continuará nos vindeiros meses por distintos concellos, entre eles, Sober, Monforte, Ribadeo, Cervantes, Cervo e Fonsagrada.
O director da Colección de Instrumentos Musicais do Centrad e comisario do proxecto “A memoria do son”, Luciano Pérez, sinalou que “a exposición ofrece a posibilidade de contemplar unha ampla representación dos instrumentos musicais máis populares en Europa, desde os albores do século XII ata finais do século XIII”.
A mostra inclúe unha giga, unha rota, unha cítola, unha viola de perna, unha viola de brazo, unha zanfona e un organistro, construídos a partir da documentación iconográfica e literaria conservada en pequenas igrexas, mosteiros e catedrais. Os fondos instrumentais complétanse con melodías accesibles, a través de códigos QR, proporcionando a oportunidade de escoitar o son de cada un deles.
Luciano Pérez Incidiu na “vontade divulgadora do proxecto, que pretende chegar a todo tipo de público desde alumnado de centros educativos ata músicos, mestres artesáns e investigadores”. Precisamente, pensando no público non especializado, a mostra complétase con propostas interactivas e materiais lúdicos. Así, as persoas que a visiten poderán interpretar melodías de cantigas de Afondo X e Martín Códax nun salterio. De cara ao público máis novo, ofrécense dous pasatempos -un crebacabezas e un encrucillado- que incorporan os contidos da exposición de forma lúdica.
Ademais, a exposición conta cun catálogo, en catro idiomas, editado en papel pero tamén dispoñible para descargar, en formato pdf, na páxina web do Centro de Artesanía e Deseño.