Deputación e Asociación Cultural Fiadeira renovan a súa colaboración para promover a música tradicional lucense
García Porto destacou o papel primordial deste colectivo “ao fomentar e dar a coñecer a nivel europeo, a través deste programa, a cultura musical da nosa provincia, a través dos bailes, instrumentos, traxes típicos e cancións”
A achega do organismo provincial está dirixida á promoción dos valores culturais, patrimoniais e etnográficos da provincia de Lugo
O Goberno da Deputación renova a súa colaboración coa Asociación Cultural Fiadeira de Antas de Ulla, para a difusión da música tradicional en Europa. Faino cunha achega de 9.000 euros co obxectivo de dar a coñecer a cultura galega a través da música tradicional, o folclore e os traxes tradicionais.
A achega do organismo provincial está enmarcada dentro do proxecto da asociación, Europeade, FAM e Clases, que xira arredor da promoción dos valores culturais, patrimoniais e etnográficos da provincia de Lugo, a través da participación no festival europeo Europeades; no Festival da Amizade musical (FAM), que ten lugar en Antas de Ulla; e a través de obradoiros relacionados coa música tradicional.
A Deputada de Cultura, Pilar García Porto, subliñou que “o feito de que a Asociación Cultural Fiadeira participe nun evento europeo como é Europeade no que participan cada ano arredor de 5.000 bailaríns, músicos e cantantes de toda Europa, para impulsar a cultura dos pobos, e no que desfilan cos seus traxes típicos, significa unha gran difusión para a cultura galega fóra das nosas fronteiras”.
García Porto destacou o papel primordial deste colectivo “ao fomentar e dar a coñecer, a través deste programa a cultura musical da nosa provincia, a través dos bailes, instrumentos, traxes e cancións. Trátase dun importante intercambio cultural no que participan grupos de tódalas nacionalidades europeas”.
Festival da Amizade Musical de Antas de Ulla
O FAM é un festival de música tradicional que se vén facendo na Comarca da Ulloa, coa colaboración da Deputación. En 2018 celebrouse a quinta edición deste evento que difunde a cultura galega a través da música, perseguindo o intercambio cultural e de experiencias musicais, como canto galego e bailes.
Obradoiro de instrumentos
A Asociación Cultural Fiadeira organizou un obradoiro de instrumentos caseiros de percusión, coa axuda da Deputación. A actividade achegou aos participantes aos instrumentos de percusión menos empregados, como culleres, pinas, morteiro, prato de porcelana, táboa de fregar, ferriño ou sacho.
